Бәйрәм алдыннан, кунак килер алдыннан һәркем өен җыештыра, ватылганын ясый, җитмәгәнен җиткезә, булмаганын булдыра. Менә Урмай авылында урнашкан мәчетләрдә дә шундый эшләр эшләнде.

Урта  үзәк мәчеттә, язып үткән идек, Чабаксарда яшәүче эшмәкәр Илгизәр Сафиянов  булышлыгы белән мәдрәсәгә компьютерлар һәм башка техник җиһазлар алынды. Аның өстенә Илгизәр әфәнде мәчет янына брусчатка җәйдерде,  лампалы утлар куйдырды, җәен ял итү өчен һәм балаларны укыту өчен җәйге беседка ясатты. Моны эшләүчеләр:мәчет карты Харис абый Гыйбатдинов җитәкчелегендә, Әнвәр Гыйбатдинов, Хайдәр Сафиянов, Минсәет Фасхутдинов башкаруында булып чыкты. 

"Кара пулат" мәчетендә җылы юк иде. Кияметдин Мифтахутдинов әйткән сүзен үтәде. Үзенең исәбеннән газ  линиясен тартттырды, коммуникацияләргә тоташтырды. Әлеге мәчеттә эш дәвам итә, махсус  газ сервисыннан килгән белгеч-эшчеләр  газны тәһарәтнәмә белән олы  бинага тоташтыру эшләрен алып баралар. Бүген иртәгә мәчеттә җылы булачак.  Шул ук вакытта , мәчеттә корбан гаетына укырга килүче мөселманнарны каршы алырга җыеналар. Фәнис хәзрәт Сафиуллин  мәчетне җыештыру, ут приборларын барлап, лампаларын алыштырып, тагын башка җитешмәгән эшләрне эшләр өчен   яшь егетләрне  эмәгә чакыра.  

Урмай авылының өч мәһалләсендә дә корбан чалучы мөселманнар бик күп, аларның санын әле барламаган, санамаган. Имамнарның әйтүенә караганда, корбан чалучыларның саны елдагыдан караганда ким түгел, киресенчә артыграк булырга тиеш.

Тагын бер эш, иң кирәклесе. Быел корбан гаеты ял көннәренә туры килде, бик яхшы. Димәк Урмай халкының иртәгәдән зыяратлар өстенә барып, каберлекләрне чистартырга вакыты бар.  Моны иртәгә эшләсәк бик яхшы булыр иде. Кыргый куаклардан арынып, чүп-чарлардан чистарта алсак бик шәп булыр иде. 

Барыгызны да киләчәк бәйрәмнәр белән. Салыначак корбаннарны Алллага Тәгалә кабул итсен!