Чуашстан татарлары оештырган «Минем шәҗәрә” исемле икенче «Көмеш каләм” конкурсы йомгакланды. Әлеге бәйгедә Чуашстан, Татарстан, Башкортостан республикаларыннан, Пенза өлкәсеннән 100 гә якын конкурсант нәсел шәҗәрәсенә багышланган иншалар белән катнаштылар. Аның 50-гә якыны Фәрит Гыйбатдиновның «Урмай” сайтында һәм Чувашия республикасы татарларының «Вакыт” газетасында дөнья күрде.
Инша язучыларының яше төрледән, 6 яшьлек бала, мәктәп укучылары белән бергә татар теле укытучылары да көч сынашты. Жюринең рәисе – Илдус Әмирхан, «Әмирхания” фонды рәисе, танылган галим, мәгърифәтче.
Жюри әгъзәләре:
Фәрит Гыйбатдинов- сайтны алып баручы;
Римма Бикмөхәммәтова – яшь журналист;
Александр Долгов- яшь журналист;
Рәфис Җәмдихан- журналист;
Айзат Шәймәрданов – журналист;
Раил Өметбаев- яшь журналист, ТНВ каналында «Хәерле иртә” тапшыруын алып баручы.
Йомгаклау Бөтендөнья татар конгрессы бинасында үтте. Конкурсның җиңүчеләре финалга Казан шәһәренә бүләкләнү тантанасына үзләре яки якын туганнары белән килделәр. Бүләкләү бәйгесендә танылган шәһесләр, Бөтендөнья татар конгрессы Башкарма комитеты рәисе Ринат Закиров, Бөтенрусия татар авыллары оешмасы рәисе Рәшит Сәнҗапов, Урмай авылы мөхтәсибе Фәнис хәзрәт Сафиуллин, конкурсның төп оештыручы Фәрит Гыйбатдинов , конкурсның жюри әгъзаләре Александр Долгов, Римма Бикмөхәммәтәва, Азат Шәймарданов , журналистлар һәм Татарстанның ТНВ һәм ГТРК тележурналистлары катнашында үтте. Музыкаль яктан бәйрәмне Урмай авылының танылган халык исемен йөртүче "Мишәр” фольклор һәм эстрада ансамбле белән Шыгырдан авылының яшь җырчысы Рәмис Халитов бизәделәр.
Икенче "Көмеш каләм "конкурсында җиңүчеләр дипломнар һәм кыйммәтле бүләкләр белән бүләкләнделәр. Соңыннан конкурста җиңүчеләр, кунаклар Г.Камал театрында якташыбыз Ркаил Зәйдулланың юбилей –иҗат кичәсендә катнаштылар.