Бүген бар, иртәгә юк......Кеше гомере шулай итеп яратылган. Берләре китә, тагын берләре якты дөньяга килә. Һәркайсының үзенең юлы, үзенең тәкъдире.

Менә кичә ,җомга көн алдыннан, кичке тугызлар тирәсендә, авылыбызның тагын бер танылган шәһесе, алдынгы карашлы  укытучы- мөгаллиме, Сәлах улы Гарәф Фәхретдинов якты дөньяны  калдырып, бакый дөньяга китеп барды. Гарәф абый, бездә укытучы мөгаллимнәрне, хөрмәтле  кешеләрне шулай дип дәшәләр, Урмай авылында 1952нче елның 25 нче октябрендә  Салях абзыйларның беренче  баласы булып дөньяга килә. Авыл мәктәбендә укый, авыл мохитендә, аның гореф-гадәтләренә буйсынып интеллегент карашлы , акыллы фикерләүче, йомшак телле булып үсә. Яшьтәшләре төсле, яшьтән читкә китеп балта остасы булып эшли, ишле гаиләгә булыша, аннан белемен  үстерер нияте белән Казан  дәүләт педагогия институтының тарих факультетына кереп укытучы хөнәре буенча белем ала. Гомерен укытучы хезмәтенә багышлый, аны яратып чын күңелдән үти. Укытучы булып  Чурачык, Урмай авыллары мәктәпләрендә эшләп, балаларга тарих һәм  обществознание дәресләреннән белем бирә. 2001нче елдан алып 2010елга кадәр Урмай авылының төп белем бирү мәктәбе директоры булып эшли, бу хезмәттә үзен чын кеше, оста җитәкче-укытучы итеп күрсәтә. Иске мәктәп булуга карамастан, балаларга белем бирү өчен бөтен мөмкинлекләрен, укыту өчен шартлар тудыра ала. Совет заманасында укытучы хөкүмәтнең идеологы булып та хезмәт итә. Минемчә әлеге идеология хезмәте, ул чактагы  заманның,  механизмның иң кирәкле бер инструменты иде. Гаилә, төрле социаль институтларда халыкны тәрбияләү эшен алып бару бик кирәк иде. Гарәф Саляхович күп еллар пропагандист.-агитатор булып халыкка  кирәкле мәгълүмәт, белем бирде. Ул заманнарда халыкта телевизорда юк иде. Ул үзенең белемен халыкка җиткезеп яшәде. Ферма, кырларда, мәдәният йортында эшләүче халык белән , агарту эшләрен алып бара белде. Гарәф абыйда сөйләү культурасы бик зур һәм көчле иде, аудиторияне үзенә бер илахый көч белән тартып алып бара белә иде. Бәлки шуңа күрә тарих фәннәре дәресендә  балалар гомере буе Гарәф абыйны яраттылар, аны үз иттеләр.

Бүген аның бу дөньяда , аны ихтирам иткән меңләгән авылдашы калды, бергә эшләгән укытучы хезмәттәшләре,  матур гына тормыш  иткән аның яры тормыш иптәше калды, әти-әнисе һәм гаҗәеп чибәр, акыллы булган өч кызы һәм улы калды. Гарәф абыйның урыны оҗмахта булсын иде. Без инде аны бу дөньяда якты хатирәләр белән искә алып һәрчак догадар булырбыз!.